Alle Hesse sin Verbrescher …
Denn sie klaue Aschebescher !!! …


So lautet zumindest aans von de meist verbreitetste Vorurteile …
Mit dene mir es jeden Daach zu tue hawwe ...
Mir Hesse hawwe es awwer aach net leicht ...
Kaan Zugang zum Meer …
Zu de Alpe …
Un aach net zum Ausland ...
Sowas prägt …
Wie de Matthias Beltz früher schon …
Ganz rischdisch gesagt hawwe tut ...
Die Hesse sin die Serbe von Deutschland ...

Wenn es aber tatsächlisch …
En Ort gewwe sollt …
Der so ähnlich iss …
Wie des klaane …
Uns wohlbekannte …
Gallische Dorf …
Dann muss des in Hesse sei ! …

Die Hesse sin nämlisch trotz allem …
E friedlich Völksche …
Alsemol e bissje motzisch un knurrisch …
Awwer im Große un Ganze …
Sin des ganz goldische Kerlscher un Mädscher ...
Die hawwe so ihr Eischenenarte …
Un e paar Sitte un Gebräusch …
Die wo die …
Die wo net vun do sin …
Net immer so verstehe tue …
aber des mescht nix ...
Vielleicht könne mer Eusch ja jetz …
Des ganze Gedöns mit dene Hesse …
E bissje näher bringe ...
Un weil die Hesse so komisch babbele …
Kann mer des aach noch gleich mitlerne ...

En aanzisches Problem tuts dodebei gewwe : …
Hessisch gibbts eischendlisch gor net ...
In Hesse werde wahrscheinlich …
e paarhunnert verschiedene Dialekte gesproche ...
Kaans is wie es annere ...
Des wo mer jetzt hier lerne kann …
Iss dann aach eher so e Allerwelthessisch ...
Des hat schon de Babba Hesselbach gebabelt …
De Henni un de Gerd von Badesalz …
Un selbst unsrn Goethe ...
So verkehrt kanns also gor net sei ...
Viel Spass un Erfolsch ! …

~Was en Rotz !~ …
Denk sisch so manchaaner …
Der wo zum erstemal versuche tut …
Hessisch zu babbele ...
Manche Eigeplackte tun sisch aber aach schwer dodemit …
Dodebei kann des jeder lerne ...
Do könne se aaner druff lasse ! …
Die Schnuud e bissje hänge lasse …
Un dann schee locker aus em Unnerkiefer : …
~E Schnibbelsche haaß Flaaschworscht un e Bembelsche gesche de Dorscht !~ …
Hessisch babbele iss gor net so schwer ...
E paar Reschel tuts gewwe …
Wenn mer sisch do dro halde tut …
Dann kann so gud wie gor nix mehr bassiere …

Dobbelt gemobbelt hält besser …
Das Konsonantendoppel als Schlüssel zum Erfolg …


Beim babbele mache mir ja net nur gern emal …
Aus em ~p~ e ~b~ …
Un aus em ~t~ e ~d~ …
Naa …
Mir leeschee dann aach noch gleich aaner mit druff ...
Babba …
Babbedeckel …
Dozzbällsche …
Äbbelkrebbel …
Labbeduddel …
Ruffzuus un runnerzuus ...


~Ch~ könne mer net …
Buchstabenkombinationen …
Die wir gerne
Unseren Schweizer Freunden überlassen …

So e bissje Probleme …
Hawwe mir ja mit dem ~c~ un dem ~h~ …
Wenn die gewissermasse als Einheit ufftauche ...
Do könne mir net viel mit aafange …
Un desdewesche werd da aach meistens e ~sch~ draus : …
Aschebescher …
Messerstescher …
Schnarschnaas …
Sprüschklobber …
Zuckerschnecksche …
Stöffsche schlabbern …


Es ~e~ werd im allgemeine
Im Hessische genauso gebabbelt wie uff Deutsch …
Es sei denn …
Es steht allaans in de Geschend rum ...
Dann werds nur mal kurz dursch de Rache gestöhnt …
Un dann is Ruh : …
Es is e Schand ...
Oder : …
E Schnäppsche mache ...

Es ~ei~ brauche mir …
Wenn des dann midde in aanem Wort steht …
Nur manschmal ...
Ganz oft werd des nämlisch zum ~dobbel-a~ …
Wie in …
Holzbaa …
Flaaschworscht …
Oder klaa Knoddel ...

Ganz annerster iss des
Mit dem ~Ei~ am Aafang vom Satz ...
Da könne mir des eischendlisch
Fast immer gebrauche ...

Es ~g~ nach em ~dobbel-a~ …
Werd zwar alsemol noch als ~g~ geschriewwe …
Klingt aber spätestens beim babbele …
Eischendlisch mehr nach e Mischung aus em ~g~ …
Un em geröschelte ~ch~ nach em zwölfer Bembelsche …
Wobei mir des widderum ja eischendlisch gor net könne ...
Trotzdem :
Saachesemol …
Frooch misch net …
Oder Aachedeckel ...


Es ~n~ am End vom Wort …
Des verschlucke mir aach alsemol : …
Flutsche …
Flatsche …
Badsche ...

So wie mir üwwerhaupt emol gern …
De letzte Buchstabe weg lasse ...
So wischdisch kann der net sei …
Sonst tät der net am End stehe! …
Worschtsupp …
Wutzeböhnsche …
Wasser lasse ...


~pf~ brauche mir net …
Buchstabenkombinationen …
Die nun wirklich niemand braucht …

Es ~pf~ hawwe mir so guud wie abgeschafft ...
Des werd entweder ganz ohne ~f~ gebabbelt …
Wie beim Pannekuche
Oder em Pund Derrflaasch
Oder mir mache aus dem ganze Gebambel …
Gleich e ~dobbel-b~ ...
Äbbelwoi …
Dorschschlubbe …
Hinnedruffhübber ...


De Dativ iss dem Genitiv sein Tod …
Des Genitivs Ende …

Wenn se jetzt net ganz wisse …
Was en Genitiv iss …
Dann sin se da genau rischdisch ...
Mir wisse des nämlisch aach net so genau …
Un desdewesche hawwe mir den abgeschafft ...
Also…
So e Gefuddel wie ~Fischers Fritze~ …
Werde se bei uns net finde ...
Des haaßt dann …
~De Fischers ihrn Fritz~ ...
Oder …
Wenn se mit de Fischers selber babbele täte …
~Ihne ihrn Fritz~ ...

Mer tut was mer kann …
Aktive Sprachgestaltung …

De Hesse tut sei gesamtgesellschaftliche Aktivitäte …
Aach gern in de Sprach zum Ausdruck bringe …
Un wie sollt des besser gehe als wie mit ~tut~ ...
So mache mir schonemal gern aus em …
Anunfürsisch passive Vorgang en aktive ...
Mir saache net …
~Isch hab Koppweh~ …
Sondern : …
~Mir tut de Schädel brumme~ ...
Des gestehe mir nadürlisch aach annern zu …
Wie des Beispiel …
~Der tut aagewwe wie e Duttvoll doode Mücke~ …
Anschaulisch mache tut ...
Also immer schee uff des ~tut~ achte! …
~Isch tu die Rundschau lese~ …
~Der tut beim Opel schaffe~ …
Oder …
~Mir tue so als wie wenn mir nix verstehe täte~ …

Bei dem sisch hinner dem ~tut~ tummelnde Verb …
Iss es dann wischdisch de Infinitif zu nemme ! …
Sonst iss des Geknorz …
Des wo kaaner mehr verstehe tut ...
Wenn isch also saach : …
~De Gallier tut sisch mit de Römer bummbe~ …
Muss des ~bummbe~ in de Grundform stehe …
Sonst isses net rischdisch ...

Wenn mer des geschnallt hawwe …
Dann brauche mir um für die Vergangeheit zu bilde …
Nur noch e ~ge~ vornedran …
E locker ~hawwe~ hinnedran …
Un am Verb werd e ~t~ drangefuddelt …
Dademit des passe tut ...
~gestern tu isch en leckere Handkäs gehabbt habbe~ …
~De Hebberd tut aussehe als wie wenn der en Bus geknutscht habbe tät~ …


De Könner …
Tut net fuddele …
Net knorze …
Un net huddele ! …
Beim zusammeknoddele von einzelne Wörter …
Mache mir anunfürsisch so gar kaa groß Gedöns ...
Babbele wie einem de Schnabel gewachse iss …
Haaßt des Motto …
Un wer des lerne will …
Der sollt sisch aafach an die paa Reschel halde …
dann werd des was ...


Anzeige

Kommentare (0)


Anzeige